બેનીમાનું ગીત

કોઈની કોળે કૂખ
મારે મન સાહ્યબીભર્યું સુખ.

આમ તો વરણ બેયની બેનીમા છું
મારે બેય હાથે બસ વહેંચવો હરખ,
કોઈના બેલી થઈએ અને
હૈયે ઉમંગ લ્હેરવા લાગી જાય અમૂલખ.

આંતરે કૂડાં દુઃખ
ને તોય હસતાં-ગાતાં મુખ.

માંહ્યલો ચોખ્ખોચમ છતાં
હડધૂત થવાનું જાત મૂઈને વેતરી નાખે,
માણસ થઈને માણસ વચ્ચે
શીદને આવી ભેદ હળાહળ સાચવી રાખે?

એકબીજા સન્મુખ
મળે તો મનની ભાગે ભૂખ...

૧.૦૧.૨૦૦૯
૧૨.૧૧.૦૨ દૂરદર્શનના 'કથાસરિતા'માં પ્રસારિત હરીશ માંન્ગલામની 'દાયણ' વાર્તાનું શીર્ષકગીત