આંગળીઓ

વારંવાર બેધ્યાન કરતા
વિક્ષેપને ટાળવા
એકલવ્યે
ખીચોખીચ બાણવર્ષણથી
ચૂપ કરી દીધું ભસતા કૂતરાનું મુખ.
એમાં
ભોગ લેવાયો અંગૂઠાનો,
દક્ષિણારૂપે.
આવી જ કથાઓનાં
પ્રકારાંતરે પ્રગટતાં રૂપોની ચીસો,
શોરબકોર અને ચિત્કાર
હું પથારીએ પડ્યો સાંભળું છું
ને
મનોમન કણસી ઊઠું છું.
ધૂંધવાઈ જઈને
વીંઝ્યા કરું છું ખાલી હાથ, હવામાં.
પ્રદુષ્ટ હવા
પડઘા પાડી પાડીને બતાવે છે ટીકો.
અમારા છતાં ભલા હાથ ,
તોય જુઓને !
ડિંગો તો હમેશાં તેઓ જ બતાવે છે અમને
તેઓ જાણે છે
અંગૂઠા વિનાના અમારા હાથની નિરર્થકતા.
એટલે જ
અંગૂઠાનો વસવસો ત્યજીને
હવે
અમારા તરફ વળેલી
અમારી અર્ધ ચંદ્રાકાર આંગળીઓને
અમે શીખવી રહ્યા છીએ
અંગૂઠાનું કૌશલ...

૧૫.૦૮.૨૦૦૦